DunyaDesk logoDunyaDeskNews • Jobs • Classifieds • More
News

عون عباس قتل کیس: مریدکے میں مبینہ پولیس مقابلے کے دوران دو ملزمان ہلاک

By DunyaDesk · 2026-10-28

عون عباس قتل کیس: مریدکے میں مبینہ پولیس مقابلے کے دوران دو ملزمان ہلاک

مریدکے: 28 اکتوبر 2026 – پنجاب کے ضلع شیخوپورہ کی تحصیل مریدکے میں عون عباس قتل کیس (پانچ سالہ بچے کے اغوا، زیادتی اور قتل) میں نامزد دو مشتبہ ملزمان سی سی ڈی پولیس کے مبینہ مقابلے میں ہلاک ہو گئے، جبکہ ان کے دو ساتھی فرار ہونے میں کامیاب ہو گئے۔
پولیس کے ترجمان کے مطابق بدھ کے روز 34 چک روڈ پر چار مشتبہ ڈاکو مبینہ طور پر واردات میں مصروف تھے کہ پولیس موبائل کو دیکھتے ہی انہوں نے فائرنگ شروع کردی۔ پولیس اور ملزمان کے درمیان فائرنگ کے تبادلے میں دو مشتبہ افراد ہلاک ہوگئے، جبکہ دو دیگر موقع سے فرار ہوگئے۔
پولیس نے ہلاک ہونے والے افراد کی شناخت آصف اور اس کے ساتھی منیب کے نام سے کی ہے۔ حکام کے مطابق عون عباس کے قتل کی تحقیقات کے دوران ان دونوں افراد کے مبینہ طور پر اس جرم میں ملوث ہونے کے شواہد سامنے آئے تھے۔
پولیس کا کہنا ہے کہ دونوں مشتبہ ملزمان مقتول بچے کے پڑوسی تھے۔ حکام کے مطابق ملزمان پر الزام ہے کہ انہوں نے بچے کو جنسی زیادتی کا نشانہ بنانے کے بعد قتل کیا اور لاش گاؤں کے ایک تالاب میں پھینک دی۔
پانچ سالہ عون عباس پانچ بہنوں کا اکلوتا بھائی تھا۔
پولیس نے دعویٰ کیا ہے کہ مقابلے کے بعد ہلاک ہونے والے افراد کے قبضے سے اسلحہ بھی برآمد ہوا ہے۔ دونوں لاشوں کو قانونی کارروائی کے لیے تحصیل ہیڈکوارٹر اسپتال منتقل کردیا گیا۔
حکام کے مطابق فرار ہونے والے دونوں مشتبہ افراد کی گرفتاری کے لیے سرچ آپریشن جاری ہے۔
راولپنڈی میں بھی بچے سے زیادتی اور قتل کا ملزم مبینہ مقابلے میں ہلاک
اس سے قبل 13 اکتوبر 2026 کو راولپنڈی میں بھی سی سی ڈی پولیس نے ایک مبینہ مقابلے کے دوران 15 سالہ بھتیجی کے ساتھ جنسی زیادتی اور قتل کے مقدمے میں نامزد ملزم کو ہلاک کرنے کا دعویٰ کیا تھا۔
پولیس کے مطابق ہلاک ہونے والے ملزم کی شناخت ممتاز عباسی کے نام سے ہوئی تھی، جو ایبٹ آباد کا رہائشی تھا۔ فائرنگ کا تبادلہ رتہ امرال تھانے کی حدود میں بچوں کے پارک کے قریب عالم آباد اسٹاپ کے نزدیک ہوا تھا۔
پولیس کا کہنا تھا کہ ملزم کے دو مبینہ ساتھی فرار ہوگئے تھے، جن کی گرفتاری کے لیے کارروائی جاری تھی۔ موقع سے ایک 30 بور پستول اور گولیاں بھی برآمد کرنے کا دعویٰ کیا گیا تھا۔
حکام کے مطابق ملزم پر الزام تھا کہ اس نے چند روز قبل اپنی بھتیجی کو مدرسے جاتے ہوئے اپنے گھر لے جاکر جنسی زیادتی کا نشانہ بنایا اور بعد ازاں قتل کردیا۔ پولیس کے مطابق لڑکی کی لاش ملزم کی رہائش گاہ سے برآمد ہوئی تھی۔

Share: WhatsAppFacebook
← Back to home

Comments

No comments yet. Be the first to share your view.

Comments are checked before they appear.